馬可福音 ． 馬爾谷福音
[和合本譯名 ． 思高本譯名]
Μάρκος • Mark 1
第一章
施洗約翰
1 神嘅仔，耶穌基督福音嘅開頭。2 就好似先知以賽亞咁寫：
「睇清楚啊，我要喺你之前就派我嘅傳話人去，
佢去準備你條路。
3 喺荒蕪地帶有把聲叫出嚟：
『去準備主嘅路，
整番直佢條路。』」
4 施洗嘅嗰個約翰就嚟咗荒地嗰度，講赦罪嘅悔改洗禮。5 成個猶太地區同耶路撒冷嘅人都出嚟去到約翰嗰度，認咗佢哋嘅罪，喺約旦河裏面俾佢施洗。6 約翰着住駱駝毛嘅衫，條腰戴咗條皮帶，食嘅係蝗蟲同野生蜂蜜。7 佢傳道嗰陣咁講：「喺我之後，有嗰人要嚟，佢強過我㗎，我就連烏低幫佢除鞋帶都未夠資格。8 我係用水幫你哋施洗㗎喳，但係佢會用聖靈嚟幫你哋施洗。」
耶穌受洗、受引誘
9 嗰陣時耶穌由加利利嘅拿撒勒嗰度過嚟，喺約旦河俾約翰施洗。10 佢一喺水裏面上嚟就見到嗰天裂開咗，聖靈好似隻鴿咁落喺佢嗰度。11 跟住有把聲喺天上面嗰度嚟：「你係我好錫嘅仔，我對住你好開心啊。」
12 之後聖靈就將耶穌趕到去個荒地。13 佢喺荒地嗰度四十日，俾撒但引誘，而且佢又同埋啲野獸一齊，又有啲天使服事佢。
耶穌喺加利利
14 約翰俾人拉咗之後，耶穌嚟到加利利傳神嘅福音，15 就話嘞：「時候就到喇，神嘅國就快嚟到㗎喇。悔改、信福音啦！」
16 耶穌經過加利利嘅海邊，見到西門同西門嘅兄弟安得烈放塊漁網落海（因為佢哋係漁夫）。17 耶穌就同佢哋講：「嚟跟我啦，我會令到你哋做捉人的漁夫㗎！」18 佢哋就即刻連漁網都唔要，跟咗佢走。
19 耶穌行前啲，又見到西庇太嘅仔雅各同雅各嘅兄弟約翰喺船上面補緊個網。20 耶穌即刻叫佢哋，佢哋就將阿爸西庇太同啲工人留喺船上面，之後就跟咗耶穌。
邪靈上身
21 佢哋去到迦百農，喺安息日，耶穌就即刻入去會堂教人嘢。22 大家都對佢教嘅嘢好詫異，因為佢自己好有權威，唔似嗰啲律例專家咁樣。
23 嗰陣喺會堂嗰度，有個人俾邪靈上咗身，佢喺度大叫：24 「拿撒勒嗰個耶穌，我哋同你冇挐冇掕喎？你嚟毀滅我哋呀？我知你係邊個啊，咪就係神嘅聖者囉！」25 但係耶穌鬧佢：「收聲！喺佢度出番嚟！」26 邪靈搞到嗰個人抽筋同埋大叫，跟住就出咗嚟。27 大家都好驚，所以就互相問大家：「發生乜嘢事啊？係啲權威嘅新道理喎！連佢命令嘅嗰啲邪靈都聽佢話咊。」28 就係咁，耶穌嘅消息就傳晒去成個加利利嘅地區嘞。
醫病、傳道
29 佢哋一走出會堂，就同埋雅各同約翰，去咗西門同安得烈嘅屋企。30 西門嘅外母病咗，發燒、一路瞓响度，佢哋就即刻話畀耶穌聽。31 耶穌嚟到，輕輕拉住佢嘅手，扶佢起身，佢就退咗燒。佢就開始去服事佢哋嘞。
32 到咗夜晚日落之後，佢哋帶晒啲病咗同埋鬼上身嘅人嚟揾佢，33 全個城嘅人都聚晒喺門口。34 耶穌醫好咗好多患咗唔同病嘅人，又驅趕咗好多魔鬼出嚟，但係佢唔准啲鬼講嘢，因為連啲鬼都識佢。
35 第朝天未光，耶穌就起身，自己去咗個荒地，喺嗰度祈禱。36 西門同啲拍檔去揾佢，37 揾到佢就同佢講：「個個都猛咁揾緊你喎。」38 耶穌答佢哋：「我哋一齊去第度嘞，去隔離啲村，咁我就可以喺嗰度傳道咯；我嚟就係為咗咁做㗎喇。」39 就係咁，佢去晒加利利嘅嗰啲會堂去傳道同埋驅魔。
痲瘋病人
40 有次有個生痳瘋嘅人嚟跪低囈耶穌，佢話：「你如果肯，就可以令我變番乾淨㗎喇。」41 耶穌起咗同情心，就伸隻手去摸佢，然後話：「我肯。你乾淨晒㗎喇！」42 嗰個生痲瘋嘅人即刻走開，咁佢就乾淨晒。43 耶穌即刻趕佢走，仲要警告佢，44 對住佢講：「你千祈唔好同其他人講呀，但係你要去揾祭司，畀佢睇吓你個身，仲要因為你乾淨晒就要跟住摩西嘅規定捐獻祭物，用嚟畀證據佢哋睇。」45 但係佢出咗去就四周圍公開講，揚開晒呢件事，搞到耶穌以後唔可以公開行入城，唯有留喺出面偏遠嘅地方，而大家仲繼續由周圍嘅地方走過嚟揾佢。
簡介
在整個《聖經．現代粵文譯本》計劃中，我首先翻譯這卷書，原因如下：
(a) 這是三卷符類 (對觀) 福音書之一，對象是羅馬的外邦人。
(b) 這是最短的福音書，但對事件的描述卻很詳細，著重描寫主耶穌像僕人服侍許多人。這卷書字數較少，因為較少教訓或比喻的記載，而且也略過主耶穌的出生和早年事蹟。
(c) 對譯者來說，更重要的是，這卷書與其他福音書相比，文筆較簡潔樸實，但細節卻很豐富。當然，譯者也要掌握譯入語 (粵語) 當中偏向簡潔的風格來配合原文。
(d) 大部份學說(例如 Two-source hypothesis 和 Farrer hypothesis)認為這是成書最早的福音書，其餘兩卷符類福音也有使用這卷書的材料。
(e) 1908年，大英聖書公會邀請翻譯大師嚴復作示範，也是挑選這卷書的頭四章，翻譯成文采斐然的文言。大師的示範作，注重句子的長短、平仄，用字嚴格，主要用作研究語文，而不是神學方面的譯經問題。他們選定以〈馬可福音〉作翻譯實驗，也許這是四福音書中，最合適的起點。
註釋
1 平行經文：太3:1–12；可1:1–4；路3:1–18；約1:19–28。τοῦ εὐαγγελίου ᾿Ιησοῦ Χριστοῦ可指基督傳的福音(比照：某某傳的訊息)，或基督之福音(指福音的主題就是基督)。NET指這可能是故意語帶雙關。翻譯為「耶穌基督福音」可保存雙關語。至於「神嘅仔」未能像原文般放在「基督」後面 (即類似英文句式 “… Jesus Christ, Son of God”)，主要是因為粵語文法原因；所以只能放在最前。
2 瑪3:1。
3 賽40:3。
4 βαπτίζων與馬太、路加的βαπτίστης不同[NET]，所以馬太譯作「施洗約翰」(比照：陳大文律師)，馬可譯作「施洗嘅嗰個約翰」(比照：做律師嘅嗰個陳大文)。
6 ἔσθων是現在時態分詞(present participle) [Yap]，所以不譯作「食緊」。
7 ἰσχυρότερός指能力更強大，但如果由約翰口中說出，似暗指約翰自己的能力也頗強大，與原文約翰謙遜的語氣不配合；因此譯作較簡潔的「強過我」。κύψας可譯俯身、彎腰，但省略「身、腰」等名詞會更貼切。官話白話文難以省略名詞，但粵語可以只用「烏低」而無須用「烏低身」。
9 平行經文：太3:13–17；可1:9–11；路3:21–22。
12 平行經文：太4:1–11；可1:12–13；路4:1–13。
14 平行經文：太4:12–17；可1:14–15；路4:14–15。παραδοθῆναι意思較廣，此句沒有詳情，不宜譯作「下監」。
16 平行經文：太4:18–22；可16–20；路5:1–11。
21 平行經文：可1:21–28；路4:31–37。
22 中文「文士」一詞原本泛指有文才的人 (例：三國演義：66回)。γραμματεύς指專職抄寫的專才，而抄寫的內容主要是摩西律例和其他的律例，所以對現代讀者來說，「律例專家」較貼切。此處用「律例」而不是「律法」或「法律」，因為「法」字易令現代讀者混淆，不論是歐洲大陸法或英式普通法，其意義，淵源和本質也和當年的律例有很大分別，「律例」一詞較接近原文意思。
23 ἀκαθάρτῳ 字面意思是不潔，但現代人可能誤解為醫學上的不清潔，因此意譯為「邪」。
24 NET指τίἡ μῖν καὶ σοί是俗語或口頭慣用語，本身是提問句，所以譯作同類的粵語慣用語「冇挐冇掕喎？」
29 平衡經文：太8:14–17；可1:28–34；路4:38–41。
30 「話畀耶穌聽」，原文沒有「耶穌」，只有代詞。
34 有抄本多了Χριστὸν εἶναι，也有其他抄本有其他字。NET指多出的字似屬後加，這裏依賴NET的意見。
35 平衡經文：可1:35–39；路4:42–44。
40 平衡經文：太8:1–4；可1:40–45；路5:12–16。
41 NET指耶穌ὀργισθείς(憤怒)的抄本可能比一些指耶穌σπλαγχνισθείς(憐憫)的抄本更可靠。但由於未有定論，暫時依大多數譯本的選擇，即後者。