馬可福音 (和合本)
馬爾谷福音 (思高本)
Μάρκος • Mark 2
第二章
癱嘅病人
1 之後過咗一排，耶穌返去迦百農。啲人聽見話佢喺屋企，2 就有好多人聚埋去，迫到冇晒位，甚至連度門嗰度都冇位；耶穌就對佢哋講道。3 有人帶住個癱咗嘅人嚟見耶穌，係有四個人抬佢嚟嘅；4 因為人多，佢哋帶唔到佢入去，就將嗰度嘅屋頂拆咗，跟住將癱咗嗰個人連埋佢瞓緊張床褥都吊埋落去。5 耶穌見到佢哋咁有信心，就對癱咗嗰個人話：「後生仔，你嘅罪赦免咗嘞。」6 有幾個律例專家坐喺嗰度，喺心裏面諗：7 「呢個人點解咁講㗎？佢喺度講緊啲褻瀆嘅嘢喎！除咗神之外，仲有邊個可以赦罪啫？」8 耶穌即刻知道佢哋心裏面咁樣諗，就對佢哋講：「你哋心裏面點解咁樣諗呢？9 對癱咗嘅人話『你嘅罪赦免咗』易啲呀，定抑或講『起身，攞起你張床褥，用腳行』易啲呢？10 但係就係要你哋知道，人個仔喺呢個世上係有赦罪權嘅。」就跟住對癱咗嗰個人講：11 「我而家同你講，起身，攞埋你張床褥，返屋企。」12 嗰個人就起身，即刻攞住張床褥，當住佢哋面行咗出去。大家都好驚奇，就將榮耀歸畀神，仲講：「我哋從來冇見過啲咁嘅事喎！」。
同利未食嘢
13 耶穌出到去海邊，大家都跟住佢嚟，佢就教佢哋嘢。14 耶穌經過嗰陣，見到亞勒腓個仔利未坐喺個收稅站上面，就對佢講：「跟我啦。」他就起身，跟咗耶穌。15 耶穌喺利未嘅屋企一齊食嘢嗰陣，有好多收稅佬同罪人，都同埋耶穌同門徒一齊坐，因為好多人都跟咗耶穌。16 法利賽人之中嘅律例專家，見到耶穌同埋啲罪人同稅吏一齊食嘢，就對佢嘅門徒講：「點解佢同啲收稅佬同罪人一齊食嘢啊？」17 耶穌聽見，就對佢哋講：「康健嘅人就唔使醫生嘅；有病嘅人先至要。我唔係嚟見正義嘅人，而係要見啲罪人。」
禁食
18 有日，約翰嘅門徒同啲法利賽人禁食緊，咁佢哋就嚟問耶穌：「點解約翰嘅門徒同法利賽人嘅門徒就禁食，但係你嘅門徒就唔禁食呢？」19 耶穌對佢哋講：「新郎同賓客喺一齊嗰陣，賓客點可以唔食嘢呢？新郎一齊喺度嗰陣，佢哋就唔可以唔食嘢。20 但係新郎從佢哋當中被帶走嘅嗰日就嚟到㗎喇，到時佢哋就要禁食嘞噃。21 冇人會將未縮水嘅布補喺件舊衫上面；咁做係會令到新嘅嗰塊布扯爛件衫，等裂開嘅埞方仲大笪。22 亦都冇人會將新嘅酒裝喺舊嘅皮袋裏面；咁做係會令啲酒整裂個皮袋，搞到啲酒同個皮袋都冇埋。新嘅酒係要裝喺新嘅皮袋裏面嘅。」
安息日
23 喺安息日，耶穌喺塊麥田嗰度經過，而佢嘅門徒行過嗰陣搣咗啲麥穗，24 咁法利賽人就同耶穌講：「睇吓，點解佢哋喺安息日做啲唔啱規矩嘅嘢啊？」25 耶穌對佢哋講：「你哋從來冇讀過大衛同佢嘅隨從肚餓嗰陣做乜嘢呀？26 佢嗰時點樣入咗神嘅殿啊，嗰陣亞比亞鉈係大祭司，大衛犯規食咗嗰啲祭司先食得嘅陳設餅，仲畀埋佢嘅隨從食𠻹？」27 跟住又對佢哋講：「安息日係為咗人嚟設立嘅，而唔係人為安息日嚟設立嘅。28 所以，人個仔亦係安息日嘅主人。」
註釋 (更新：2025年11月8日)
1 平衡經文：太9:1－8；路5:17－26。
6 「律例專家」：見1:22註釋。
10 「人個仔」：官話白話文譯作「人子」，此詞常見於福音書各章。NET指可能是亞蘭文的慣用語，可能指「有人」或「自己」，但在此節必然是指自己。
13 平衡經文：太9:9－13；路5:27－32
14 「跟」：Ἀκολούθει 可指「跟着」去某處或「跟從」某人。如屬前者，廣東話多用「跟住」，例：「跟住我」；如屬後者，多只用「跟」，例：「跟我」。
15 「收數佬」：τελῶναι被耶穌指為罪人，是羅馬帝國的稅收制度使然。當時每一區域的收稅權以「價高者得」的方式競投，取得收稅權的人便可在該區域向人民收取稅金，但稅金的計算欠規範，多收的錢無須上繳，自然導致濫收、威嚇、暴力等問題。此外，取得收稅權的人，不會親自處理稅務工作，而是外判給其他人，而這些人又再一層一層地把工作再外判，每一層的人在收稅和計算的過程中都私自圖利，猶如強奪民脂民膏，運作模式與現代黑幫相似。聖經指的「罪人」，通常是指上述最底層的人，若譯作「稅吏」、「稅務官員」等，可能令現代讀者誤會他們只是替政府工作而已。廣東話譯作「收稅佬」、比照另一常用詞「收數佬」，也許較貼切。
16 「律例專家」：見1:22註釋。
18 平衡經文：太9:14－17；路5:33－39。
23 平衡經文：太12:1－8；路6:1－5。
24 「唔啱規矩」：οὐκ ἔξεστιν 指不守安息日的戒條。有不少英文譯本用 unlawful 或 not lawful(例：NIV, ESV 等)，但中文「法」字的用法比英文的 law 狹窄(例如物理學的牛頓定律，英文用 Newton’s laws of motion，但中文不會稱之為「法」)，如果譯作「不守法」，容易令現代讀者誤會。以當時語境來看，耶穌和法利賽人也知道對方指什麼規條，所以譯作「規矩」較貼切。
26 「亞比亞鉈係大祭司」：NET 指現時我們對這片語所用的希臘文文法結構了解不足，未知是否指當時亞比亞鉈 (Ἀβιαθὰρ)是大祭司(ἀρχιερέως)，但翻查舊約記載，該事件發生時，亞比亞鉈卻不是大祭司。因此，未知是〈馬可福音〉的現存抄本有誤，或該片語另有意思。此處暫依NET 如此譯。另外，《和合本》把Ἀβιαθὰρ譯作亞比亞他，但「他」字容易令人誤會，所以用了同音字「鉈」。
26 「犯規」：見註釋2:24。
26 「陳設餅」， ἄρτους τῆς προθέσεως ，此處以字面意思 (見NET註釋) 作譯名，而不是意譯為供餅、聖餅、或呈獻餅等。或可比照「月餅」譯作 mooncake，而不是意譯為中秋節吃的餅。
28 「人個仔」：：見註釋2:10。