馬可福音 (和合本)
馬爾谷福音 (思高本)
Μάρκος • Mark 3
第三章
枯乾嘅手
1 之後耶穌又入去會堂，喺嗰度有個人，隻手枯乾咗。2 大家吼住耶穌，睇佢喺安息日醫唔醫病，係想要控告耶穌。3 耶穌對嗰個隻手枯乾咗嘅人話：「起身，企喺中間呢度。」4 又問大家：「喺安息日做善事或者做壞事，救人命或者害人命，究竟啱唔啱規矩呢？」但係佢哋都唔出聲。5 耶穌周圍𥇣住佢哋，好痛心佢哋咁冷漠，就同嗰個人講：「伸手出嚟。」佢一伸手出嚟，隻手就好番。6 啲法利賽人即刻行出去，同希律嗰黨人商量點樣可以剷除耶穌。
海邊醫病
7 之後耶穌同門徒走到去海邊，有好多由加利利嚟嘅人跟住佢；8 仲有好多人聽見他做嘅好多嘢，就由猶太、由耶路撒冷、由以土買同約旦河外面，仲有推羅、西頓周圍嚟到佢嗰度。9 因為人多，佢就吩咐門徒叫隻艇等佢，唔使咁多人迫住佢。10 佢醫好咗好多人，所以凡係有病嘅，都擁入嚟想摸吓佢。11 無論邪靈幾時見到佢，都伏低喺佢面前，大叫：「你係神個仔。」12 但係耶穌好惡咁警告佢哋，唔好揭露佢嘅身份。
十二門徒
13 之後耶穌上咗山，叫自己想召嘅人嚟；佢哋就嚟到佢嗰度。14 佢就揀咗十二個人，要佢哋跟自己，會派佢哋去傳道，15 仲畀權佢哋驅魔。16 耶穌幫西門改名做彼得，17 又幫西庇太嘅兩個仔雅各同佢嘅兄弟約翰改名，叫佢哋做半尼其（意思係雷電個仔），18 仲有安得烈、腓力、巴多羅買、馬太、多馬、亞勒腓個仔雅各、達太，仲有激進嘅西門，19 同埋出賣耶穌嘅加略人猶大。
褻瀆聖靈
20 耶穌入咗間屋，好多人聚埋一齊，佢哋甚至連食個包都唔得閒。21 耶穌嘅親戚聽見，就出嚟想拉住佢，因為佢哋話佢癲咗。22 由耶路撒冷過嚟嘅律例專家話：「佢係俾別西卜上身」；又話：「佢係靠魔頭嚟驅魔。」23 耶穌就叫佢哋嚟，用比喻對佢哋講：「撒但又點能夠趕撒但出嚟呢？24 如果一個王國內鬨，呢個王國就會冧；25 如果一家人內鬥，嗰家人都會散。26 如果撒但自己打自己，他亦會企唔住，會滅亡。27 冇人能夠入去一個大隻佬嘅屋企去搶佢屋企啲嘢；梗係要先縛住嗰個大隻佬，先至可以搶佢屋企啲嘢。28 我真係要話畀你哋聽，全部人嘅所有罪同所有褻瀆嘅說話都可以原諒；29 但係褻瀆聖靈嘅人就永遠冇得原諒，要永遠承擔呢個罪。」30 佢咁講就係因為佢哋話「佢鬼上身」。
耶穌嘅屋企人
31 嗰陣耶穌阿媽同兄弟嚟到，企喺外面，派人去耶穌嗰度叫佢。32 有班人坐喺耶穌周圍，佢哋就話畀佢聽：「睇吓，你阿媽同你嘅兄弟喺外邊揾你喎！」33 耶穌就答：「邊個係我嘅阿媽？邊個係我嘅兄弟？」34 跟住四周望吓周圍坐喺度嘅人，然後講：「嗱，呢啲就係我嘅阿媽同我嘅兄弟喇。35 邊個跟住神嘅旨意去做，就係我嘅兄弟姊妹同我嘅阿媽嘞。」
註釋 (更新：2025年11月8日)
1 平衡經文：太12:9－14；路6:6－11。
1 「枯乾」：ἐξηραμμένην，此字意思就是枯乾，例如在4:6用作指植物枯乾 (ἐξηράνθη)。當年醫學知識不如今天，病癥以常用的詞語表達，不足為奇。配合當年的歷史背景，此節同樣用枯乾。
2 「吼住」：παρετήρουν ，NET指在此處用有負面意思，因此用「吼住」。
4 「規矩」：見註釋2:24。
8 「推羅」：Τύρον，這城今天仍沿用此名。華文媒體有譯作泰爾、蘇爾、提洛、提爾、推羅。現沿用《和合本》的譯名。
11 「邪」：見註釋1:23。
11 「伏」粵音有二：fuk6和buk6，但配詞「伏低」必讀buk6。
13 平衡經文：太10:1－4；路6:12－16。
13 「召」：見註釋1:20。
18 「激進嘅」：Καναναῖον，NET 指這裏似用作形用西門的個性，而不是他的某些政治聯繄。
20 平衡經文：太12:22－32；路11:14－23；12:10。
22 「律例專家」：見1:22註釋。
31 平衡經文：太12:46－50；路8:19－21。
32 「兄弟」：NET指有些希臘文抄本寫「兄弟姊妹」，但疑似後加。此處依NET的意見。
35 「嗱」：Ἴδε ，在此處不一定譯作「看」。廣東話對話時，「嗱」同樣可表達邀請對方留意看某處。此處耶穌在回答問題，譯作「嗱」較貼切。