撒種嘅比喻

¹耶穌再喺海邊教人嘢。有好多人聚喺佢嗰度，佢就上去海上面嘅一隻艇，坐低，大家就企喺岸上面，靠近海邊。²耶穌用比喻教佢哋好多嘢，喺教佢哋嗰陣佢咁講：³「嗱，聽住！有個播種嘅人出去播種。⁴播種嗰陣，有啲種子落喺路邊，雀仔飛嚟担咗去；⁵有啲種子就落喺冇乜泥嘅石上面，因為泥層好淺，發芽好快飆出嚟，⁶日頭出嚟一曬就枯咗嘞，因為冇根吖嘛；⁷有啲就落咗喺荊棘裏面，荊棘生起嚟迫住啲種子，就冇收成嘞；⁸又有啲落咗喺好嘅泥裏面，就會發芽生長，有啲收成有三十倍，有啲六十倍嘅，仲有啲有一百倍𠻹」；⁹跟住又話：「有耳仔就要聽住呀！」

¹⁰冇人嗰陣時，跟住耶穌嘅人同十二個門徒都問佢，呢啲比喻係點解。¹¹耶穌同佢哋講：「神嘅國嘅秘密，就畀咗你哋知嘞。但係如果係對外人講，就全部要用比喻，¹²等佢哋

睇係睇見，但係就唔識；
聽係聽見，但係又唔明；
費事佢哋返轉頭過嚟，就赦免咗佢哋嘅罪。」

解釋播種嘅比喻

¹³跟住同佢哋講：「你哋唔明白呢個比喻咩？咁仲點去明其他嘅比喻呢？¹⁴播種嗰個人播嘅種就係道嘞。¹⁵種子播喺路邊，就係有人聽咗道之後，撒但就即刻嚟，將播喺佢心裏面嘅道攞咗去。¹⁶種子播喺石地上面，就係有人聽咗道之後，就即刻好開心咁接受咗，¹⁷但係佢心裏面冇根，只不過係暫時嘅，到咗要為咗道而受難嗰陣，或者受人迫害，就即刻仆低嘞。¹⁸仲有啲種子播喺荊棘裏面，就係有人聽咗道，¹⁹之後有啲世俗嘅憂慮、財富嘅誘惑，同其他嘅慾望入咗嚟，將個道迫住咗，就唔能夠有收成。²⁰至於有種子播喺好嘅泥上面，就係有人聽咗道，又接受，仲有收成，收成有啲有三十倍嘅，有啲有六十倍嘅，仲有一百倍𠻹。」

油燈

²¹耶穌又同佢哋講：「油燈唔係應該放喺籠底或者床下底㗎嘛，係咪？唔係應該放喺燈臺上面嘅咩？²²冇嘢係收埋咗就唔被發現嘅；亦冇秘密嘢係唔顯露出嚟嘅。²³有耳仔就要聽住呀！」²⁴又話：「要留心你哋聽到嘅嘢。你哋用乜嘢量器嚟量嘢畀人，人哋亦會用番咁嘅量器嚟量嘢畀你，仲會畀多啲你𠻹。²⁵有嘅人就仲要畀佢；冇嘅人就連佢剩低嗰啲都俾人攞埋。」

芥菜種子嘅比喻

²⁶跟住佢繼續講：「神嘅國就好似有人將種子播喺地下。²⁷夜晚瞓覺，日頭起身，種子就發芽，佢係唔知點解會發芽𠺝。²⁸農作物自然喺泥生出嚟，發完芽就結麥穗，最後麥穗結粒；²⁹穀物成熟咗，佢就去攞鐮刀，因為夠鐘收割嘞。」

³⁰跟住佢繼續講：「神嘅國，我哋可以用嚟比較啲咩呢？可以用咩比喻嚟形容呢？³¹好似一粒芥菜種子，種落去地下嗰陣，雖然係咁多類種子之中最細嘅，³²種咗落去，長大咗，就比其他植物都大棵，又生出好大枝嘅樹枝，甚至天上面嘅雀仔都可以俾佢遮蔭。」

³³耶穌用咗好多咁樣嘅比喻，照住佢哋能夠聽得明嘅，將道解畀佢哋聽。³⁴如果唔用比喻，就唔會對佢哋講；但係冇人嗰陣，就將所有嘅道講畀佢自己嘅門徒聽。

大風浪

³⁵嗰晚耶穌對門徒講：「我哋去對面岸啦。」³⁶門徒離開咗啲群眾，耶穌喺隻艇度，佢哋就載佢過去；亦有其他艇跟住佢去。³⁷突然間吹大風，海浪打到入隻艇裏面，隻艇積滿水。³⁸耶穌喺船尾，挨喺張墊褥上面瞓覺。啲門徒叫醒佢，同佢講：「老師！我哋就死嘞，你唔理呀？」³⁹耶穌醒咗，鬧啲風，向住個海講：「靜低！唔好郁！」風就停咗，水亦靜晒。⁴⁰耶穌問佢哋：「點解咁驚青啊？你哋仲係冇信心呀？」⁴¹佢哋就好震驚，互相咁話：「到底佢係邊個啊？連風同海都聽佢話咊！」