格拉森嘅邪靈

¹佢哋嚟到海嗰邊，格拉森嗰區。²耶穌一落船，就有個俾邪靈上身嘅人喺墳地嗰度出喺望住佢。³嗰個人一路住喺墳地嗰度，冇人可以綁住佢，就算用條鍊都唔得；⁴因為好多次有人用腳鐐同啲鍊綁住佢，但係啲鍊俾佢整斷晒，連腳鐐都俾佢整碎埋；始終冇人可以制伏佢。⁵佢日日夜夜都喺墳地同埋山上面大叫，又用石頭砍自己。⁶佢離遠見到耶穌，就跑過去伏低拜佢，⁷大聲叫：「至高神個仔耶穌，我同你冇挐冇掕喎？我指住神求求你，唔好要我受苦啦！」⁸（係因為耶穌有同佢講：「邪靈！喺呢個人身上出番嚟！」）⁹耶穌問佢：「你叫乜嘢名？」佢答：「我叫做『兵團』，因為我哋有好多人」。¹⁰佢猛咁求耶穌唔好趕佢哋出嗰笪埞方。

¹¹喺嗰個山丘上面，有一大堆豬喺度食嘢；¹²有啲邪靈就求耶穌：「求你送我哋去堆豬度，上堆豬嘅身啦！」¹³耶穌批准佢哋，啲邪靈就出咗嚟，入咗去堆豬裏去。跟住嗰堆豬就跑咗落山坡，跳咗入湖，大概有二千隻豬浸死咗。

¹⁴放豬嘅人就走咗去，話晒畀城裏面同鄉下嘅人。好多人就嚟咗，要睇睇係乜嘢事。¹⁵佢哋嚟到耶穌嗰度，見到嗰個鬼上身嘅人，就係之前俾「兵團」上咗身嗰個，坐咗喺度，着住衫，好清醒，佢哋就好驚；¹⁶見到發生喺鬼上身嗰個人事上嗰件事嘅嗰啲人，將件事話晒畀人知，就連嗰堆豬嘅事都講埋；¹⁷大家就求耶穌離開佢哋嘅嗰區。¹⁸耶穌上船嗰陣，嗰個之前鬼上身嘅人求耶穌畀佢跟住一齊。¹⁹耶穌唔准佢咁樣，但係就同佢講：「你返屋企，同埋去你啲親戚屬度，話畀佢哋聽，主幫你做乜嘢，同埋係點樣對你仁慈。」²⁰嗰個人就走咗，喺低加坡里周圍講耶穌幫佢做咗咁多嘢，大家都覺得好出奇。

患病、醫治

²¹耶穌又坐船去對面岸，有好多人聚集响度；嗰陣佢喺海邊。²²有個會堂主管叫做睚魯，佢嚟見耶穌，就伏喺佢對腳前面，²³猛咁求佢：「我個細女就快死啦，求求你去用手放喺佢身上，咁佢就會好番，會醒番㗎喇。」²⁴耶穌就同佢一齊去，一大班人迫埋去佢嗰度。

²⁵嗰陣，有個女人患咗慢性婦科出血病已經有十二年，²⁶佢經過好多醫生經手受咗好多苦，又用晒佢嘅積蓄，都冇好番，病情反而仲嚴重咗。²⁷佢聽見耶穌嘅事，就喺班人中間行去耶穌後面，摸一摸耶穌件衫，²⁸因為佢一路講：「我淨係摸吓佢件衫，我就一定會好番㗎喇。」²⁹佢出血嘅病徵就即刻停咗，佢感覺到自己身體嘅病已經好番。³⁰耶穌亦即刻知道到有度力由佢自己身上出咗去，就喺人群裏面轉身間：「邊個摸我件衫啊？」³¹門徒問佢：「你睇吓啲人都迫埋去你嗰度，仲問『邊嗰摸我』呀？」³²但係耶穌周圍睇，要睇吓邊個咁做。³³嗰個女人知道發生喺自己身上嘅事，就驚到震，伏喺耶穌前面，將件事講晒畀佢聽。³⁴耶穌對佢講：「阿女，你嘅信心令你好番喇，放心返去啦！你嘅病好番晒㗎喇。」

唔好驚、信就得㗎喇

³⁵佢講緊嘢嗰陣，有人由會堂主管嘅屋企嚟到，仲咁講：「你個女過咗身啦，何必仲要勞煩老師呢？」³⁶但係耶穌冇理佢講乜，仲同會堂主管講：「唔好驚，信就得㗎啦！」³⁷除咗彼得、雅各、同埋雅各嘅兄弟約翰之外，佢唔准其他人跟住佢。³⁸佢哋嚟到會堂主管嘅屋企；耶穌見到好嘈，啲人流眼淚、喊得好淒厲，³⁹佢入到去，就同佢哋講：「點解你哋咁傷心，喺度流眼淚呢？個細路唔係死咗，只係瞓着咗啫。」⁴⁰佢哋就開始恥笑佢，但係耶穌趕佢哋出去，跟住帶埋細路嘅父母同埋隨從入咗去細佬嗰度，⁴¹拉住細路隻手，同佢講：「大利大，古米」，意思就係：「細路女，我同你講：起身。」⁴²個細路女即刻起身，仲開始行路；佢十二歲。佢哋都好驚奇。⁴³耶穌好認真咁命令佢哋，唔好俾人知道呢件事，亦都吩咐佢哋俾啲嘢個細路女食。